جروب ثيرابي – الفصلين الأول والثاني

جروب ثيرابى

بقلم : د/ رباب فارس 

الفصل الأول

في غرفة كبيرة في المركز  النفسي يقف د/صلاح وأمامه ٤ فتيات جالسات على كراسي مرتبة في نصف دائرة … ؛ يبتسم د صلاح ويوجه حديثه إليهم ….انا سمعت حكاية كل واحدة فيكم قبل كدة .. وانا شايف أنكم مش محتاجين طبيب نفسي…اد ما انتم عايزين حد محايد يسمعكم .ويساعدكم تسمعوا الصوت اللي جواكم … محتاجين فضفضه..بس فضفضه هادفة
…وعرضت عليكم اننا نعمل زي جروب ثيرابي..بس بشكل مختلف
…كل واحدة فيكم حتحكي حكايتها ادامنا كلنا
…وده حيديكم دعم كبير
….انا اخترت لكل واحدة فيكم اسم مجازي .. عشان ميكونش في حرج و انتوا بتحكوا حكاياتكم ..
حتحكوا حكاياتكم وحتوصفوها كأنها مشهد ادامنا ..
محدش يحكم … محدش يحكم على نفسه أو علي غيره..
اوصفوا الأحداث… مجرد وصف
يبتسم .وهو يجول بعينيه بينهم..
مدام عبير …٣٤ سنة موظفة في شركة .. متزوجة وعندك طفلين ………مدام الهام …٣٦ سنة…ربة منزل… متزوجة وعندك ٣اطفال…..
…… آنسة  جني ..٢٦ … مهندسة في شركة كبيرة…..آنسة جوري …٢٣ سنة .. خريجة الجامعة الأمريكية..بس مش بتشتغلي …
مدام عبير ومدام الهام …انتوا الاتنين ..متشابهين في حاجات كتير…آنسة جني وانسة جوري .. متشابهين في حاجات كتير كمان………اتفضلوا دلوقتي. ومن المرة الجاية. حنسمع مع بعض.. حكاية كل واحدة فيكم…. تمام…

يبتسموا جميعا … تمام يا دكتور صلاح

ـــــــــــــــــــــــــــــــــــــــــــــــــــــــــــ
الفصل الثانى

يبتسم دكتور صلاح….
بنبدأ بجوري …. اتفضلي…
تبتسم جوري  وتقول بثقة .. انا اسمي جوري ….طولي ١٦٧ سم ووزني مش بيعدي ابدا ٦٥ كيلو … دايما جميله ورشيقة …..وده لاني ببذل مجهود كبير جدا….
انا يوميا لازم اروح الجيم مش اقل من ٣ ساعات…وبحسب أكلي بالكالوريز…
دايما بحافظ علي بشرتي من الشمس ومن اي حاجه ممكن تضرها ..و دايما بستخدم كريمات اورجينال..ومش بستخدم ماكياج الا قليل جدا..ولازم طبعا اورجينال ..
مش بحط علي بشرتي اقل من ميبيلين وماكس فاكتور (ثم تبتسم بزهو وهي تجول بعينيها بينهم…
وعشان كده انا جميله زي ما انتم شايفي (يعقد د صلاح حاجبيه ويقول لها وهو يثبت وضعية نظارته…كملي ياجوري….
(تتحول ملامحها الي الحزن..
.مرة .وانا في النادي..ويومها كانت بشرتي جميلة جدا..ولابسه فستان جميل اوي…….قابلته … ثم تصمت
(تبتسم لها الهام بحنان ..مين ده اللي قابلتيه؟
(تتنهد جوري ….حسام … شاب اسمر طويل ..عينيه عسلي ..شعره بني .. وعنده ذقن خفيفة وجميلة……
هو مهندس في شركة كبيرة…..(تعقد جني حاجبيها …يعني انتي وصفتي لون بشرته وشعره وعينيه ودقنه…وفي الاخر تقولي مهندس؟!
(ينظر دكتور صلاح لجني…احنا هنا عشان ندعم بعض…مش عشان نسخر من بعض

(ثم ينظر إلى الجميع.. وممنوع مقاطعة حد الا  بكلام يشجعنا و يدعمنا

(تنظر جني إليه خجلا…انا اسفه جدا يادكتور ..
(ينظر لها بحنان..تمام يا جني …
ثم ينظر إلى جوري ..كملي ياجوري لو سمحتي …….
(تتنهد في سعادة….بعد ما اتكلمنا شوية صغيرين…قالي بحبك ..وبعدها باسبوع كنا اتخطبنا ….
(تبتسم عبير …يااه خطبك بعد اسبوع؟   ده بيحبك اوي ….
(تنظر لها جوري بحزن …مش عارفه ياعبير ..كنا طايرين من السعادة….
ياما اتجننا مع بعض..وكنا بنروح كل حتة مع بعض..صورنا كانت كلها فرحة ..كان دايما يقولي انتي احلى حاجه في الدنيا……وكان دايما يتغزل فيا وفي جمالي..كان بيسرح في عينيا .. ويقول لي اني اجمل بنت في الدنيا……فضلنا ٦ شهور كلها سعاده…وبعدها لقيته بدأ يتغير ولما أكلمه يرد متأخر.. ومبقاش عنده نفس اللهفة اللي كانت عنده زمان …وفي مرة قاعدين مع بعض…..
___________________________________________
(تنظر  جوري إلى حسام  بعتاب …انا زعلانه منك اوى يا سمسم
(يزفر في ضيق…خير .. زعلانه من ايه؟
(تنظر إليه بحزن .. امبارح كانت ليلة رأس السنة..متصلتش بيا تقولي stay with me
(ينظر حسام بفم ملتو صامتا..
(تمسك يديه ..ايه يا حسام..مش بترد عليا ليه؟
(ينفث دخان سيجارته بعصبيه وينظر لها غاضبا.. عشان زهقت… حقيقي زهقت ..
انتي عايشه في دنيا لوحدك…دنيا فاضية ..انا حاسس انك طفله…
مش حاسة بيا ولا بأى حاجه في الدنيا..
متعرفيش اني طالع عينيا في الشغل .. عشان اخلص الأقساط اللي عليا بسبب طلباتك اللي مبتخلصش ..
وعايزة شقتك احلي من شقق كل صاحباتك…
عايزة تخرجي وتتفسحي وتتصوري وتنزلي صورك على الانستجرام..وصحباتك يقولولك احلى جوري دي ولا ايه..مبعرفش اتكلم معاكي في اي حاجه…
(تنظر إليه بتعجب ..في ايه يا حسام …انت عصبي ليه كدة انهاردة ..هو حصل ايه
(ينظر لها حزينا..مفيش حاجة حصلت .انتي حلوة جدا ..مقدرش أنكر ده..
حلوة وجميلة وكلك انوثه….لكنك.حلوة وبس …..وبس(يترك دبلته ويغادر
_____________________________________________

(تتنهد جوري.وتقول .. ساعتها مزعلتش اوي من اللي حصل..
كنت معتبراها خناقة عادية .. عشان محصلش حاجه تخليه يزعل ….
كنت بقول أن في حاجة مزعلاه من شغله مثلا … كنت متأكدة أنه راجع …مش ممكن يلاقي حد أجمل مني..
ده كان رأيي ورأي كل صاحباتي و …عملتله بلوك من كل السوشيال ميديا..
(يبتسم دكتور صلاح…بس اكيد كنتي بتراقبيه من اكونت فيك.
(تنظر له بجدية..لا ..خليت …شاهندا صاحبتي تقوم بالمهمة دي بدالي …
(يضع دكتور صلاح يديه على جبهته.ويقول لها ..وياتري شاهندا اكتشفت حاجه خطيرة؟!
(تنظر إليه بحزن شديد….
بعد شهرين بالظبط..خطب يادكتور..تخيل؟!
(يرفع احدي حاجبيه ويقول بنبرة جدية …بعد شهرين….اممم……
انتي تعرفيها؟
(تتحول ملامحها الي الحزن…
أيوة زميلته في شغله …
(يتصفح ملامحها .. كان بيجيب سيرتها ليكي قبل ما تسيبوا بعض؟
(تنظر له بتعجب…أيوة فعلا .. في الفترة الأخيرة…كان بيجيب سيرتها كتير …
كان دايما بيقول انها شاطرة في شغلها وجدعه .. ومكافحة.. عشان باباها مش عايش ..وهي بتساعد مامتها في تربية اخواتها ….
(ينظر لها بابتسامة عريضة….امممم….شقيانة يعني ؟!
(تنظر باشمئزاز.. ايوة .جربوعة
(يثبت وضعية نظارته وينظر لها بجدية…شقيانة ياجوري …مش جربوعة …..
(تنظر إليه بحزن شديد وتبكي…. معقوله يسيبني..انا جوري ويخطب دي ..
انا ممكن اوريك صورتها يادكتور ..مش جميله..اقل من جمالي بكتير اوي اوي …
انا جميله جدا. وواثقة من نفسي اوي….
لما سابنى كنت متأكدة أنه حيرجع ..مش عارفه ليه مرجعش…
(تربت الهام علي كتف جوري بحنان …
وتقول عبير .. متزعليش يا جوري انتي مغلطتيش في حاجه..
(تمسح دموعها وتقول بنبرة انكسار…انا نفسي أكلمه اساله ..نفسي اعرف ليه سابنى انا عملت ايه…..
نفسي اعرف انا عملت ايه ..
(ينظر لها دكتور صلاح بتعاطف…
متتصليش بيه يا جوري ..وانا حبقي اقولك ..هو ليه سابك …
(ثم يتوجه بحديثه إليهم ..احنا خلصنا انهاردة ..والمرة الجاية حنكمل … مع عبير



حساب د/رباب فارس على موقع فيسبوك:
http://bit.ly/2SuIKa7

الصفحة الرسمية ل د/رباب فارس على موقع فيسبوك:
http://bit.ly/2SwvgLh



اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *